Институт қызметінің негізгі мақсаты – Жаратылыстану-гуманитарлық және Әлеуметтік-техникалық ғылымдар Жоғары мектептерінің, университет департаменттерінің іс-әрекетін біріктіру мен үйлестіруді, мүдделі тұлғалар үшін қосымша білім беру қызметтерінің желісін кеңейту мен сапасын арттыруды қарастыратын біліктілікті арттыру саясатын және үздіксіз қосымша білім алуды жасақтау және жүзеге асыру.

Кадрлар біліктілігін жоғарлату және қайта даярлау институты келесі бағыттар бойынша қосымша кәсіптік білім беру бағдарламаларын іске асырады:

• Біліктілікті арттыру;
• Кадрларды кәсіби қайта даярлау;
• Қысқа мерзімді курстар;
• Ұзақ мерзімді курстар;
• Техникалық және кәсіптік білім беру ұйымдарының оқытушылары үшін тағылымдамадан өту;
• Тренингтер;
• Семинарлар;
• Тіл курстары.

КБЖжҚДИ тыңдаушылары ғылымның тиісті салаларында іргелі және қолданбалы зерттеулер жүргізіп жатқан ғалымдардың соңғы жетістіктерімен танысуға мүмкіндік алады.

КБЖжҚДИ компания қызметінің белгілі бір саласы үшін тапсырыс бойынша оқу бағдарламаларын әзірлеуге мүмкіндігі бар.

Оқу шарттары:

Оқыту Баишев Университетінің Жаратылыстану-гуманитарлық және Әлеуметтік-техникалық ғылымдар жоғары мектебінің базасында, жоғары оқу орындарының қажеттіліктері мен тыңдаушылардың мүдделерін барынша ескере отырып, икемді оқу жоспарлары бойынша ғылыми зертханаларда жүзеге асырылады.

Біліктілікті арттыру курстары құрамдастырылған нысанда (қашықтан оқыту арқылы күндізгі бөлім) жүзеге асырылады.

Курс ұзақтығы:

• Қысқа мерзімді курстар – 36-дан 108 академиялық сағатқа дейін;
• Ұзақ мерзімді курстар – 108 академиялық сағаттан астам;
• Техникалық және кәсіптік білім беру ұйымдарының оқытушылары үшін тағылымдамадан өту – кемінде 36 академиялық сағат.

Оқу аяқталғаннан кейін білім алушыларға біліктілігін арттырғаны туралы құжат (сертификат) беріледі.

Курстан өту үшін білім алушылар келесі құжаттарды тапсыруы керек:

• өтініш;
• тыңдаушының жеке куәлігі (көшірме)
• келісім 2 данада;
• оқу ақысын төлегені туралы түбіртек немесе төлем тапсырмасының көшірмесі.

Барлық сұрақтар бойынша төмендегі ақпарат арқылы хабарласуға болады:

Кадрлар біліктілігін жоғарлату және қайта даярлау институты,
Ақтөбе қ. Ағайынды Жұбановтар к., 302 а, «ZEREK» технопаркі, 003-каб.
телефон: +7(71372) 974083, (ішкі 829),
электрондық пошта: info@bu.edu.kz.

Бейресми білім

Ересектерге арналған бейресми білім беру – білім беру қызметтерін көрсететін ұйымдар оқыту орнын, мерзімін және түрін есепке алмай көрсететін және оқыту нәтижелерін растайтын құжат берумен бірге жүретін білім беру түрі.

Бейресми білім берудің мақсаты – білім беру қызметтерін жүзеге асыру үшін жағдай жасау және адамның біліктілігін арттыру және жаңа білімдер мен технологияларды меңгерудегі әртүрлі қажеттіліктерін қамтамасыз ету, жастардың, ересектердің және егде жастағы адамдардың жеке және кәсіби құзыреттіліктерін меңгеруіне мүмкіндіктер беру.

Баишев Университетінде бейресми білім беру міндеттері:

• қалыптасқан «қорытынды білім» тұжырымдамасынан «өмір бойы үздіксіз білім беру» тұжырымдамасына көшу;
• ересектерге олардың танымдық қажеттіліктерін қанағаттандыру үшін білім беру қызметтерін көрсету;
• ересектердің қосымша білім алу, жоғары оқу орнынан кейінгі білім алу бағдарламаларын жүзеге асыру;
• азаматтардың бұрын алған кәсіптік білім, білік, дағдыларын қолдау, кеңейту, тереңдету және жетілдіру үшін біліктілігін арттыру;
• білім алудың ыңғайлы, икемді, дербестендірілген бағыттарын қалыптастыру.

Бейресми білім берудің білім беру бағдарламалары бойынша оқыту үшін келесі құжаттар ұсынылады:

• өтініш,
• жеке басын куәландыратын құжат көшірмесі.

Оқуды аяқтағаннан кейін үш күн ішінде университеттің Кадрлар біліктілігін жоғарлату және қайта даярлау институты оқу нәтижелерін растайтын құжат береді.

Педагогикалық қайта даярлау курстары

Баишев Университеті жанындағы Кадрлар біліктілігін жоғарлату және қайта даярлау институты қызметінің жаңа бағыттарының бірі – педагогикалық қайта даярлау курстарын өткізу.

Педагогикалық қайта даярлау курстары Қазақстан Республикасы Білім және ғылым министрінің 2020 жылғы 17 наурыздағы № 110 бұйрығына сәйкес педагогикалық білімі жоқ, кәсіптік білімі бар және тиісті кәсіптік бағыт бойынша педагогтік кәсіби қызметке алғаш рет кірісетін адамдар үшін өткізіледі.

Курстар бойынша білім беру бағдарламасының мазмұны психологиялық-педагогикалық пәндерден (30 академиялық кредит) және педагогикалық практикадан (10 кредит) тұрады.

Педагогикалық қайта даярлау бойынша білім беру бағдарламасын меңгеру қорытынды аттестаттаумен аяқталады.

Қайта даярлау курстарында оқыту нәтижелері еңбек функцияларына (оқытушылық, тәрбиелік, әдістемелік, ғылыми-зерттеу және әлеуметтік-коммуникативтік) және педагогтың кәсіби стандартының деңгейлеріне сәйкес келуі керек.

Педагогикалық қайта даярлау курстарына қабылдау:

• университет басшысының атына еркін нысандағы өтініштер;
• жеке басын куәландыратын құжат көшірмесі;
• білімі туралы құжат көшірмесі;
• 3х4 өлшемдегі алты фотосурет;
• медициналық анықтама 086-У

негізінде жүзеге асырылады.

Ынтымақтастық

Біліктілікті арттыру курстарын өткізу үшін Институт Қазақстаннан, жақын және алыс шетелдерден модераторлар, Баишев Университетінің профессорлық-оқытушылық құрамын, өңірлік кәсіпкерлер палаталарының, жұмыс берушілер қауымдастығының өкілдерін тартады.